Back Pain in your area

下背痛是都市常見病

綁鞋帶整到下背、重訓整到下背連打個乞嗤都可以整親下背，腰痛已經成為常見都市病之一，根據研究指出8成以上人士至少經歷一次下背痛，好可能你或你身邊朋友都受到下背不適所困擾，借今次機會簡單講下點樣預防或減低下背受傷機會。

下背痛可能涉及多種結構

首先，背部下肋緣至臀部上緣之間嘅疼痛，可能涉及肌肉、韌帶、神經甚至骨骼等不同結構。作為教練，當然可以從肌肉與動作角度分析可能引致不適嘅因素，以及提供預防受傷嘅建議；但若牽涉其他軟組織、神經或病理問題，就應該交由醫生或治療師作專業評估。唔好再自己問AI。

腰椎穩定性關鍵肌肉—多裂肌

多裂肌由我哋頸椎一直連接到腰椎可以話係脊椎嘅固定器，當中多裂肌有個特別之處，位於腰椎段部分肌肉段數及體積最多亦最厚實，依個係先天身體結構設定。

不良排列容易導致腰椎受損

所謂排列講白啲，就係你骨頭、關節同肌肉排得好似「積木一樣整齊」，無論企定企、行路定做運動，都唔會歪歪扭扭、用力唔平均。好似一架車四個輪正正地貼地，行得順滑少磨損輕輕鬆鬆跑出紫圈；如果輪歪咗，車就震動、油耗大、易壞。

日常生活小調整及應用訓練

• 鞋帶時，一腳踩低凳，屈膝唔屈腰。
• 重訓前熱身核心，重量由小到大，姿勢永遠優先過重量。
• 打乞嗤前企直或扶牆，減低衝擊

核心訓練動作

橫膈膜呼吸練習

雙腳曲膝至90度，下背位置留剛好放到一隻手掌距離，鼻吸口呼，呼吸力量大約係全力呼氣嘅四分之一。

鳥狗式

擺出四足跪姿，脊椎保持中立位置，配合呼氣時將對側手腳伸直（左手右腳）（右手左腳）
期間留意唔應該有轉旋轉發生或拗腰出現。

結論

下背痛唔係宿命！由綁鞋帶到打乞嗤，日常小動作都可以傷到腰，但只要練多裂肌、調好身體排列，加上生活習慣微調，你可以成為你無病無痛嘅兩成人，從此同Back pain say bye bye。